Tuesday, February 18, 2014

如果有一日暴動,港鐵故障會係導火線


港鐵真係要打醒十二分精神,列車故障係一個嚴重政治問題,涉及國家安全,影響維穩大業。今日,東鐵故障,由新聞到站內宣布都話,大埔至紅磡五分鐘一班,我大安旨意信你一次,等啊等,等咗十幾分鐘,行一站停一停;九龍塘站,本來已經夠逼,有位仁兄死命逼上車,卡住道門,逼唔到入去,又唔肯行番轉頭,閂唔到門,開唔到車,要旁邊乘客拉佢回月台,我唔想講都要講,果位仁兄講普通話的,於是我想起蘇錦樑局長叫人「等多班車等多班車」,月台人潮洶湧,但大多數人保持沉默,眼神有點憤怒,個個忍樣,香港人其實真係好敦厚,繼續說話的,我只聽到普通話聲音。

我要申報,我不贊同上街「驅蝗」,不贊成用「蝗」字,不贊成去廣東道示威,不贊成挑起族群矛盾,實在搞錯晒對象,自由唔係咁用,示威唔係咁玩。大家的聲討對象,應該係個政策,應該係班高官,要求好簡單,請你哋班官放工繁忙時間,離開你的AM車,去金鐘站搭地鐵過海,我記得以前有人講過,金鐘站轉車,好似摩西過紅海,人人匆匆忙忙快步撲向彼岸,而家唔係,紅海已經塞住,唔係等一班車,係等三四五六七八班車,九龍塘站,放工時間日日似滿瀉,遲早逼爆玻璃幕門幾百人跌晒落路軌。

看到大家的忍樣,還有車廂內一袋袋一箱箱旅客的戰利品,我感到自豪,今日香港人仍然忍得到,已經係展示咗非常高尚的情操。這天當我在車廂內大家夾到實一實只有腦袋能稍為轉動時,我就想到暴亂如何爆發,按道理有幾個先決條件,首先係在場的人個個本來已經火滾,有矛盾點隨時挑起衝突,再加上現場有成千上萬人一呼百應,鐵路故障牽連地面交通混亂,這就是tipping point.

1984年的士騷亂,就係的士罷駛引致交通混亂人群聚集而引發,有迹可尋,歷史唔會呃你。給唔見棺材唔流眼淚的人:肯肯定,唔係講笑,港鐵一而再,再而三,民怨繼續積累,自由行繼續增加,遲早一鑊,危。

***   ***   ***

人民不是儍的:從《1984》到 2014