Saturday, May 23, 2015

不要向弱者抽刃



近日,有關「懷仔」的新聞,令人火滾︰

1. 吳克儉局長,仲有教聯,見到極右本土派到小學示威,就撲出來「非常遺憾」,廣西社團總會單嘢,以交流團作餌引導學生拍撐政改影片,又唔見你哋「非常遺憾」,又唔見你出聲,仲話係個別事件。你哋要維護學生,唔該一視同仁。

2. 成件事,陳婉嫻如果從懷仔的前途著想,從一開始就不需要咁高調,全程公開真人騷,為乜?搏掌聲?以嫻姐同政府的關係,根本不需要咁做。

3. 十二歲的懷仔,不論外表,不論佢身世,不論佢有無郁手打過人,最後遣返深圳也好,做咗難民又好,變成國際人球都好,都應該有接受教育的機會。聯合國《兒童權利公約》裡,兒童「發展權」包括接受教育。我認為,若懷仔父母健在,遣返是應該的,但調查可能曠日持久,拿「行街紙」時間漫長,讓他讀書是合理的。

4. 十二歲的懷仔,當年被父母拋棄,輾轉來到香港,無論用甚麼方式生活了九年,都不是他的錯,是大人的錯,他是一個悲劇,不應針對他。

5. 學校有教無類,何錯之有?況且只是初步評估,還未真的收生,就算表達不滿,對象應是政府與入境處,為何要到學校示威?

6. 但是,示威完畢,學校又為何不立即派人清理標語,要小學生自己清理,繼續令學生受到不必要刺激?

7. 那個女學生痛哭時,情急說了句「犯咗法又點喎!點解要貼呢啲嘢呀? 」好多人唔同情「懷仔」我明白,呢個妹妹關心學校想幫手清潔標語,說話也直率,點解唔可以畀一點體諒?

8. 點解咁多人對不夠12歲的小朋友,咁多要求,咁多批評?有幾多男仔12歲的時候無同人當街爭嘢玩講口講手?有幾多女仔12歲的時候有勇氣大庭廣眾講心裡話?

9. 至於很多人說,不能開此先例,等同吸引大批兒童偷渡來港分薄資源。那就向政府施壓、表達不滿,為何要把矛頭指向學校、指向小童?

請不要向弱者抽刃,不要向孩子問責,不要鋤弱扶強,不要反共反上腦。

***   ***   ***

有點相關文章︰
鋤弱扶強新常態 
誘騙學生是為賊