Monday, June 16, 2014

世界盃旁述爛gag記



都話,識得睇,一定睇TVB,難得四年一度世界盃,唔開電視唔得,一開,又有嘢寫。

前兩晚睇波,有個旁述話︰「嘩,喀麥隆的球員跑得咁快,一定在家鄉畀獅子老虎追得多。」先不說國族的刻板定型,非洲係無老虎的。

非洲的野生動物,有所謂big 5,是獅子、豹、大象、犀牛、水牛,肯肯定,就係無老虎,老虎的家園不在非洲,老虎住在亞洲的,如果仲未死晒。

仲有,喀麥隆,有好多大城市,不會有獅子通街走;象牙海岸的人,也不是賣象牙為生,搞gag,都唔好加深一些無知的非洲stereotype,如果有個美國大叔知道你係香港人,笑騎騎問︰你阿媽係咪蘇絲黃?你會唔會覺得好幽默?

是日,英格蘭對意大利,在亞馬遜省首府瑪瑙斯踢。有位主持失驚無神明知故問︰「亞馬遜河喺邊?」另一位沒好氣地答︰「亞馬遜區囉!」

其實「亞馬遜河喺邊?」一時間都幾難答,等同有人無端端問你「黃河啊,你喺邊?」可能係哲學問題。建議答案︰亞馬遜河在巴西北部,流域很大,上游去到哥倫比亞、厄瓜多爾、秘魯境內,都算亞馬遜河與熱帶雨林的一部分。
 
「亞馬遜河,嘩,有河鮮呀」
是日,又有足球旁述談到亞馬遜河好多野生動物,另一口痕旁述搭嗲話︰嘩,好多河鮮!又令我想起某年某日TVB的柴娃娃嘈嘈閉飲食旅遊美女節目,老遠去到亞馬遜河睇熱帶雨林野生動物,美女亮晶晶的大眼仔眨呀眨,問︰「嘩,呢度一定好多魚食啦,好新鮮!」係,亞馬遜河有食人魚的。

一個月的世界盃,九十分鐘又九十分鐘旁述,總會有幾句不經大腦的廢話爛gag,我明白。大家睇波啫,專心講吓戰術部署、球員身世,令觀眾增加睇波的樂趣咪好囉,你哋又唔係無準備,明明大把嘢講,講呢啲?

gag呢家嘢,咪咁認真啦。聽說,這個時代,認真你就輸,係,我又輸了。

[希望此文不需繼續加長。]

相關文章︰

2 comments:

  1. 仲有左邊交右邊, 完全好似唔識個球員, 唔識講咁; 還有後知後覺, 見到畫面之後講都好唔肯定, 好少有專業的評論! 又有時講旁枝的資料講到唔記得場波! 真係好想聽亞叔講波!

    ReplyDelete
  2. 其實何輝/黃興桂,兩個都唔係 TVB 人,
    就算江忠德都係今年先過檔無線,
    三個都係(前) ESPN / STAR SPORTS/ NOW SPRTS 的旁述員
    三個都講左近廿年波,而且係比較正常O個班...

    至於黃興桂 D 爛 gag,都出晒名,
    早十年已經有人幫佢集埋出左個 list ,
    而家重厚過本電話簿
    wikiquote:
    http://zh.wikiquote.org/zh-hk/%E9%BB%83%E8%88%88%E6%A1%82

    "十二碼有兩個可能,一係入一係唔入" 呢D ,
    "輸嬴唔緊要,最緊要唔好輸" 呢D
    相信無睇過波都應該聽過。

    http://evchk.wikia.com/wiki/%E9%BB%83%E8%88%88%E6%A1%82

    ReplyDelete