Wednesday, June 12, 2013

耳語(8): 端午節起火



善哉善哉,道行未夠。

在香港,扭開電視有一個好處,就係即刻火起,有靈感寫嘢。

耳語8.1
「端午節快樂」

端午節,婦女節目(還叫《都市閑情》嗎?) 一開口,就話「端午節快樂呀」,無幾耐,三個太空人仲祝「全球華人端午節快樂」,幾時開始,端午節要祝人「快樂」,我哋幾時要祝人「復活節快樂」兼送復活節禮物,幾時我哋去拜山時,要互祝「清明節快樂」、「重陽節快樂」?電視台與太空人的語言,係咪貧乏到呢個地步?

這個,小事矣。

耳語8.2
「標誌中國載人航天飛行邁上新台階」

新乜野台階?這些中央電視台新華社專用八股,香港的電視台可否用少啲?要講的話,可否改一下字眼?什麼「新台階」、「優化」、「加大力度」、「重要指示」,饒口煩厭,為何會變成電視新聞時尚術語。

記得前幾日,預告節目,竟出現「地球對太陽進行公轉」的用字,我下巴跌咗落地。

耳語8.3
「發揚王亞平精神」

神舟十號,眾所周知的一場飛天公關活動兼叻叻國民教育,為何電視台仍要大張旗鼓,不厭其煩講足七、八分鐘,仲要山長水遠派人去山東王亞平間學校,睇下如何「發揚王亞平精神」,做乜唔用些少資源時間發揚吓「李旺陽精神」?

耳語8.4
「佔領中環不如佔領中間」

又係一個唔覺唔覺,一時運滯,看到一位過氣「親中」紅人,說「佔領中環不如佔領中間」,叫人心平氣和,回到談判桌,不如「回到中間」談政制,仲話懷念上世紀八十年代基本法諮委會談政制的平和氣氛。

又係誤導。

那個年代,係中國思想較開放的時間,畢竟仲有個趙紫陽,成個氣氛係「有得傾」,唔係玩你,當然大家願意好好談,那時候提出的方案,大多民主過三十年後今天的現實。

以後的故事大家都知,立法會設分組點票,選舉設比例代表制,制度上處處自閹,到零四年,政制發展講都唔駛講,人大常委一鎚定音,名為釋法,實為修改基本法,拖延普選,致今天特區陷入進退兩難之局。前陣子,喬老爺明言何俊仁余若薇等人反中央,不符合愛國條件,轉過頭又叫你番來在圓桌上慢慢傾。

狠狠刮完你兩巴,轉個頭講兩句懶係理性平和的話,慘得過又有人信。

唉,都係熄電視,正念食粽。

***   ***   ***

舊日耳語:

有關龍尾,要講的都講過了,政府當然懶理: 

5 comments:

  1. 區生,唔"妗娉" (i.e. complain) 得咁多囉。人地都未用到 "端午節無可能唔愉快嘅公眾假期愉快" 及 "標誌著偉大的中華人民共和国載人航天飛行夢想事業無可能唔係再次邁上新一級嘅進步台階 (下刪六四二十四字)..."。

    (Anyways, 想必是預留給"思歪"用...)

    順便借問句:王亞平有乜精神?佢有乜病?吓 ... "佔領中間"即係"佔領中間道"? 即係"佔中"運動即時由 中環 搬到 九龍?唔係卦...

    順便一提:食粽危害健康,尤其是獨食。 Anyways,"端午節已經半過的公眾愉快假期愉快"... "食粽愉快"...

    正念"暗尋"中。勿念。

    ReplyDelete
  2. 唉! 區生,你都未提到呢個耳語 (抑或我錯過咗唔知?): "家是香港"

    唉! "家是香港" 變成 "家 1-K" -> 加壹減崎。等同整容 "窩可" 咗。又明明聽緊 "獅子山下",監生比人轉咗首歌重要以為過渡(transition)得好好,好夾好好聽,實質九唔搭八。 唉! 十足十香港家吓面對嘅問題。

    正念 "唉唉" 中。 端午節剩下的五十幾分鐘公眾假期快樂。

    ReplyDelete
    Replies
    1. 當權者念念不忘《獅子山下》,皆因好使好用,只是陶醉於過去,脫離現實,不知民情!

      Delete
  3. 我地鄉下有句:南無佬念經拜神,握左你幾十年 ! 用尼句比喻北京對港人“施捨”民主選舉好適合喔 !

    ReplyDelete
  4. 語言pollution是其中一道慢火,青蛙遲早會熟習熟透。而家小加昇温啫,就使人扯火彈起,區生嘅道行仲未够噃。怎地修得一篇「耳語與一行禪師」,喺電視聒聒前正念入定,坐懷不亂,以成正果?善哉!

    ReplyDelete