Thursday, April 10, 2014

《TVB血淚屎》




這本書的作者,叫「偽文豪」,我識佢好耐,佢讀中學的時候,已經係一個詩人,亦係一個溝死女靚仔 (相信而家都係),佢夢想有一日,會成為一個類似村上春樹的作家,我睇過佢詩,好掂 (我讀新詩通常毛管戙,他的詩絕對係例外)

不過,命運往往就係要玩你,我以為佢出的第一本書會係類似董橋及董啟章果類文集小說,點知佢第一本大作,竟然係呢本充滿廣東話充滿粗口而且由封面到書名都極度惡俗的《TVB血淚屎》。

書裡面,佢咁樣介紹自己︰

「……出版呢本書除咗係為咗踏上作家之路,賺返嗰一個幾毫,或多或少係想紀錄返一啲我做過嘅事,如果計埋兼職,我做過嘅嘢確實係非常之多,包括:麥當勞炸薯條賣飽專家、速遞員、銷售員、蚊型廣告公司寫手、高爾夫球雜誌編輯、地圖雜誌編輯、塔羅牌占卜師、仲有TVB PA。當中,喺 TVB PA,絕對算得上係我人生嘅黑暗時期,而且對我有相當大嘅影響。」

呢本書,就係一個曾經充滿熱誠與幻想的年輕人,在TVB做劇集助導的「人生黑暗時期」。一出宣傳,已經有好多人X佢:你只係做咗七個月,有乜嘢資格罵TVB

呢條友的標準答案:

「去西藏七個月都夠寫一本書啦……」「人哋《127 小時》都可以寫一本書,拍一齣戲啦,何況我經歷嘅嘢唔止127 小時?」

由一個PA的視角,看TVB拍劇的運作,睇完,你大概會知多一點一台獨大的惡性文化下,夢想投身影視創作年輕人的青春與熱誠,如何被收割被利用被壓價。

「……我要過住零尊嚴、斷六親、夜夜無眠嘅悲慘生活?我同好多年青人一樣,都係想搵個機會搞下創作啫,而喺TVB 過嘅每一分鐘都好似向住我呢個卑微嘅願望一巴一巴咁打埋嚟。」

偽文豪形容自己是「被閹割的猩猩」,佢文筆生動流暢,單睇標題已經頂癮:〈笑著賣自己豬仔〉〈進擊的TVBloody〉〈戰場上的快樂PA〉〈硬膠三十小時〉。

佢話,唔驚得罪人:

「……因為我係一個真理嘅無賴,咩叫真理嘅無賴?真理嘅無賴係針對社會上一啲真正嘅無賴應運而生,就好似今次咁,當你對住一間刻薄員工、當觀眾係白痴嘅電視台,你要同佢一樣咁無賴,咁厚面皮,先夠佢鬥。」

他重新寫一封給TVB的辭職信︰

「所謂嘅地獄唔係有幾辛苦,所謂嘅地獄係你做唔返自己,一個人做唔返自己,咁就算得到幾多,都冇L 用。我記得有個TVB 演員同我講過,佢話佢好多謝TVB,因為自從佢辭職離開公司,佢覺得邊度都係天堂。」

我心裡一直有一個問題:究竟有誰,在離開TVB後,完全沒有利益關係之後,會為TVB說一句好話?

本人在TVB工作過二十年,不算短的時間。我的文章偶有議論TVB,或許有舊同事會說我不念舊情,我不知其他人如何,至少我自己在TVB工作的後半階段,目睹過裁員之慘烈,公司之冷酷無情,僱傭之間那種一買一賣的關係非常清晰,TVB不會對你有情,我也不能對TVB產生任何愛護之心。

但我也絕少點名批評任何個人,一台獨大,壟斷市場,不思進取,打壓對手,扼殺創意,麻醉大眾,觀眾被馴服,這是制度使然,任何能坐上電視台高位的人,都會這樣做,他們也只是制度下的一隻棋。權貴集團,就是要這種狀態千秋萬世,寧願犧牲影視創意產業,也要牢牢掌控意識形態工具。這一兩年來的發展,明顯不過,請不要再扮天真。

相關文章:
例如這些,就是技巧高招的宣傳運作:

 

3 comments:

  1. 乜咁似另外一個極龐大體制嘅?

    ReplyDelete
  2. TVB真的是血淚工廠, 視員工為賺錢機器, 榨乾即棄. 這本《TVB血淚屎》最適合那些沈迷TVB肥皂劇的師奶閱讀, 或能將她們麻痺的腦袋帶回現實.

    ReplyDelete
  3. 古時做太監為榮華富貴,依家去做呢D另類公公為乜?

    ReplyDelete