[竟然仲獅子山] |
機緣巧合,有人「放飛」令我成為「東方昇特異功能救香港」座上客,第一次入場撐毛記,我以為粉絲們的年齡應該同我有三五七個代溝(以三年一個代溝計),點知周圍的人年紀不算少,畢竟能花得上五六百元冒一場險的人,應該不會是太廢的廢青。
第二個大發現,個人騷裏感動位不算感人,搞笑位也不太惹笑,但周圍卻有一大群人係唔係都笑,而且哈聲震天好開心。我認為一定係我鑑賞力出問題,後來有人話:果班係唔係都笑的粉絲,好似就係傳說中的「盲毛」。毛記有這群盲毛忠粉,是了不起的成就,是最寶貴的資產。
整個騷,最令我詫異的,當然不是東方昇根本無特異功能,也不是他重複了三五七次謂完全不知道如何救香港,而是他竟然想帶大家認真地思考香港問題,而且真心的茫無頭緒。一如林日曦所講,這時勢還講政治的,都係 on9 仔,未講已經知,又無結論又不討好。
開騷初段,東方昇聲嘶力竭玩國歌,城管出場,捉拿不莊嚴「hea住唱」的人,我以為接下來是一場國歌法與二十三條立法前的末日狂歡,點知呢班友花了不少篇幅講道理,竟然仲玩「獅子山下精神」(堪稱笑話中的毒草)、食碗麵時頓悟香港人的「懶肉」(實在認真到核爆)、苦思如何救香港(有幾段連我都覺得膠味濃)。最後當然無結論,但有實際「行動」,就是咬牙切齒地指着空氣說:我會留喺度,攞番果啲我應得的!(呢句話真係發聾振聵,因為東方昇嗌得好大聲。)
不感動,可能因為東方昇未夠魅力,無太多個人經歷,唸台詞欠說服力。不好笑,是因為擺在眼前是一種真實的悲涼,任何自謔自嘲,都只能是苦笑。但我佩服毛記創作團隊,敢於大減最耍家的惡搞改歌詞神技,不再追逐無止境搞笑,敢於繼續不識時務,不政治正確,不自閹縮窒,說想說的話。
沉澱期內,我們繼續唱歌,繼續搞笑,繼續上市 cap 水,繼續讀書寫字,繼續思考問題救香港;好好沉澱,十手準備,有一天,我哋會攞番果啲我哋應得的。
毛記開拓了穩定的廣告製作收益,有一群死忠粉絲,解決了生存問題,有能力多做 on9 嘢,有一口氣,點一盞燈。
黃子華聽說要「金盆𠺘口」了,即是說有一個龐大的市場空間等待填補。「棟篤王」不是一天建成的,我睇好毛記(但不要買佢哋股票)。
*** ***
***
(本文原刊於明報《2047夜》,此為加長版)
相關文章: