的士上，司機從後鏡盯着我說：「我認得你個樣同你把聲，我好多年來一直有留意你。」
吓？公仔箱拋頭露面已是好多年前的事，我隨口搭嗲：咁都畀你點相，出街真係要小心行路。
司機繼續：「你同好多香港人一樣，心裏面已經失去咗希望。」哇，你係我心裏面條蟲？
「我同好多乘客傾偈，個個都一樣，大陸人都係，失去希望。」我一直相信的士司機係最貼地的時事評論員。
「大陸人都話，社會唔公平。」吹水唔抹嘴，你點知人哋一程車會同你講真心話？
「我喺大陸做咗二、三十年生意，好了解佢哋，識得套大陸人講心底話。」「大家都覺得冇希望改變，死心。」多少英雄豪傑，大隱隱於市，每一雙軚盤上的手，都有鮮為人知的往事。
「做廠，啲貨壓到價錢好低，你若非財雄勢大，或者有特別關係，根本無得做，番來楂的士。」「我從來唔做食品，啲人乜都夠膽死，總有一個環節出事。」還說了一些，就不便寫了。
改革開放四十年，各大媒體鋪天蓋地訪問達官貴人談豐功偉績，很好，但為何不騰出一點篇幅，請一些小人物回憶一下改革得失？為何不去訪問一下那些鎩羽而歸的人們？
「守規矩的人冇得做，講原則的人冇得做，香港人而家冇位企。」
「如果佢冧咗，一定會攬炒，都係死，一樣無希望。」
談了十分鐘，畀錢，落車，的士絕塵而去，雁過不留痕。
還是那一句：有些事，做了不一定有希望，但不做肯定無希望；有時做事不是為了追求成果而做，而是因為堅守原則而做。
***
*** ***
(本文原刊於明報專欄《2047夜》，此為加長版)
其他的士奇遇記：
